Qaacceessa Ergaa Faaruu Gooticha Badhaadha Dilgaasaa: Godina Shawaa Kaabaa Aanaa Dagam

Abstract

Kaayyoon qorannoo kanaa faaruu gooticha Badhaadha Dilgaasaa Godina Shawaa Kaabaa Aanaa Dagam qaacceessuudha. Kaayyoo qorannoo kanaa galmaan gahuuf qorannoon kun saxaxa qorannoo dhimmaawaa (case study design) mala qulqulleefatatti dhimma bahe. Maddi ragaalee qorannoo kana keessatti hojirraa oolaan madda ragaa tokkoffaafi madda ragaa lammaffaadha. Maddi ragaa tokkooffaan maanguddoota, hawwaan, dargaggootaafi qabsaa’oota gooticha waajjiin qabsa’aa turan yemmuu ta’u, maddi ragaa lammaffaan immoo galmeewwan seenaafi faaruuwwaan osoo hinqaacceeffamin jiraniidha. Iddattoon qorannichaa namoota digdaamii jaha. Isaan kun tooftaa iddatteessuu kaayyeeffataa (purposive sampling) fi darbaa dabarsaatin (snow ball sampling)tin filatamaan. Meeshaaleen ragaan ittiin walitti qabamees afgaaffii, marii gareefi Sakatta’a galmeewwaniitiniidha. Ragaa haala kanaan argame bifa faaruun sun ittiin dhiyaateetti qoqoduun, akkaataa ergaa isaan dabarsaaniin qindeessuun mala qulqulleffataadhaan qaacceeffamee dhiyaateera. Ragaa qacceeffame irraa diinadgeen hawaasichaa warana mootummaa wayyaneetiin akka miidhame bira gahameera. Gama siyaasaatin immoo gooticha kanaaf kiyyoon xaxoo siyaasaa yeroo baayee kan dirirfameef ta’uudha. Yeroo baayees gootummaa isaatin injifatee keessa darbaa akka ture hubatameera. Dhumarratti garuu kiyyoo xaxoo siyaasaa tolchaadhan dirirfameen bakka Dheebisa jedhamuutti akka qabamee ofiin ofajjeese bira gahameera. Dabalatanis, faaruuwwaan gootichaa yeroo inni injifannoo argate ittiin jajuf akka kalaqamaan qorannoo kanaan bira gahameera. Kana malees, aadaa hawaasichaa kan akka gumaa baasuu, ibsuufi eegee tursiisu, seenaa hawaasichaa keessatti dhimmoota akka ququqqaa ittiin ibsachuufi goota ittiiin jajjabeessuu keessaatti faayidaa olaanaa akka qabu qorannoo kanaan bira gahameera. Dabalataanis, walaloo faaruu dhiyaate keessaatti gootichi goota cimaa, gootummaadhan dhaadachuun injifannoo galmeessuun hawaasa isaa hanga lubbuun jiruutti roorroo jalaa baasee aara kan galfachiise ta’uun argannoowwan qorannoo kanaati. Kanumarra ka’uun qorattuun Waajiirrii Aadaafi Tuurizimii, barssisoonni afaaniifi qorattoonni akkaata isaan ilaallatuun osoo irratti hojjetanii gaariidha jechuun yaada furmaataa yookan yaboo keessee jirti.