XIINXALA CALAQQEE OGAFAANII FI ITTI FAYYADAMA AFAANII SIRNA WALSEER RANNAA TUULLAA BIYYAA; GODINA ILU ABBAA BOORAA

Abstract

Mata dureen qorannoo kanaa Callaqqee ogafaaniifi itti fayyadama afaanii Sirna Wal Seerrannaa Tuullaa Biyyaa Xiinxaluu yoo ta’u, Kaayyoon qorannoo kanaas callaqqee ogafaaniifi ergaa itti fayyadama afaanii Sirna Wal Seerrannaa Tuullaa Biyyaa jedhu xinxaluudha. Qorannoon kun yaaxxina tajaajilaa gargaaramee jira. Akkasumas, qorannoo akkamtaa saxaxa ibsaatti gargaarame. Malleen iddatteessuu miti-carraa keessaa mala iddatteessuu darbaa dabarsaatiin maanguddoota aanaa Bachoofi aanaa Diiduutti kan dhimma bahe yemmuu ta’u, pirezidaantii mana murtii aanaa Bacchoofi hojjettootaa Aadaafi Tuurizimii aanaa lameen immoo mala akkayyootti fayyadame jira.Sababii qorattuun iddatteessuu kana filattes, kaayyoo qabattee kaate galmaan gahuuf, qaamolee kana filachuun ragaa barbaachisaa ta’e bira deemuun waan funaannatteefidha. Akkasmas, Maanguddoonni akka madda raga tokkoffaatti filataman kunis milkaa’ina qorannichaaf namoota murteessoodha jette waan itti amanteef. Meeshaaleen ragaan ittiin funaanaman af-gaaffii, marii gareefi daawwannaadha. Ragaaleen funaaname kunis adeemsa qorannoon akkamtaa itti qaacceffamu keessaa mala qaaccessa ibsaa gargaaramuun akkaataa walfakkeenya isaaniin walitti fiduun qaacceffamaniiru.Argannoon qorannoo kanaa akka mul’isutti ogafaaniifi itti fayyadamni afaanii duudhicha keessatti hojiirra oolan gorsuuf, barsiisuuf, hojii gaarii cimsuuf, amala badaa balaalleffachuun to’achuuf kan ooluu ta’uu isaa, tokkummaa hawaasichaa cimsuu, yakka xiqqeessuu, walitti dhufeenyiifi jaalalli gaariin hawaasicha gidduutti akka uumamu gochuu,dhaloonni afoola,aadaa,safuufi duudha hawaasa isaanii barsiisuu keessatti gahee guddaa kan qabu ta’uu qorannoo kanaan adda baheera .Argannoo kana irratti hundaa’uun faayidaa ogafaaniifi itti fayyadama afaanii duudhicha keessatti argaman irratti Abbootiin Amantaa,Abbootiin Gadaafi qaamoleen seeraa hubannoo kennuun cimsuufi beekamtii kennuu qabu.Dhaloonni borii faayidaa afoolaa,aadaa,duudhaafi safuu hawaasa isaanii beekuuf dirqama qabaachuufi qaamoleen dhimmi isaa ilaallatu hundi akka xiyyeeffannoon irratti hojjetanii jechuun dhuma irrattis, qorattun ogafaaniifi itti fayyadamni afaanii duudhicha keessa jiru duudhicha waaliin akka hin dagatamneef dhaloonni kunuunse tursiisuuf akka irratti hojjetamuuf akeekte jirti