Xiinxala Asoosama Dheeraa‘Arraa Gurbaa’ Ija Yaaxxina Dubartummaa Maarkisiistiin

Abstract

Kaayyoon qorannoo kanaa asoosama dheeraa ‘Arraa Gurbaa’ keessatti ija yaaxxina dubartummaa Maarkisiistiin dhimmoota dubartootaa akkaataa asoosamni filatame itti dhiheesse xiinxaluu dha. Saxaxni qorannichaas saxaxa ibsaati. Malli iddatteessuu kitaabni kun ittiin filatame mala iddatteessuu kaayyeffataa yoo ta’u, qorataan meeshaa funaansa ragaa hojiirra oole xiinxala barruu kan fayyadame yemmuu ta’u, ragaaleen meeshaa kanaan funaanamanis gosa qorannoo akkamtaatti gargaaramuun qaacceffamaniiru. Namfakkiileen dubartootaa asoosamicha keessatti miidhaa gama hawaas-dinagdee, miidhaa qaamaa, miidhaa saalaafi xiinsammuu gita aangoo qabuun irra ga’e xiinxalameera. Qorataanis xiinxala adeemsise kanaan argannoowwan bira ga’aman keessaa muraasni asoosama filatame keessatti hirmaannaan namfakkiilee dubartootaa kan warra dhiiraan walbira qabamee yemmuu ilaalamu baay’inni isaanii baay’ee xiqqaa dha. Kana malees sababa garaagarummaa koorniyaatiin miidhaan dubartootarra ga’ee akka jiru xiinxala kanaan bira ga’ameera. Dhibbiseefi haati Lalisee qabeenya isaaniirraa buqqaafamanii saamamuun dhiibbaa gama dinagdeen dubartootarratti ga’uu argarsiisa; gama koorniyaan dhaabbileen hawaasummaa waajjirri gandaa fi waajjirri poolisii gaaffii namfakkiileen dubartootaa gaafatan jalaa qabuu dhabuun dhiibbaa gama koorniyaan dubartootarra ga’u ibsa; itti dabalees dubartootni dhimmoota akka siyaasaa, hawaasummaa fi dinagdee keessatti hirmaannaa akka taasisan bira ga’ameera. Dabalataan gitni aangoo qabu namfakkiilee dubartootaarra dhiibbaa kanneen akka buqqisuu, doorsisuu, hidhuu, miidhaa xiinsammuuf saaxiluu geessisuun xiinxala kanaan adda ba’eera. Miidhaaan gita koorniyaa asoosama kana keessatti kan ibsame ta’uunis kan xiinxalame dha. Argannoowwan kanneeniin irraa ka’uun dhiibbaa ilaalcha duraan ture irraa maddeen miidhaa dubartootarra ga’u maqsuuf ogbarruun barmaatilee sana qeequun osoo dhiheessee gaarii dha. Akkasumas, dinagdee keessatti hirkatanii kan jiraataniifi galii argachuuf jecha hojiileen hojjetan carraa warra dhiirotaan qixaa akka argataniif xiyyeeffatanii utuu hojjetanii gaariidha. Dhiironnis ta’ee dubartoonni hojii ogbarruu keessatti walqixa hirmaachuun shoora isaanii osoo ba’anii fi barreessitootni gara fuulduraatti hojii asoosama barreessuu keessatti hirmaachuu barbaadan, dubartootni dhimmoota akka siyaasaa, dinagdee, hawaasummaa keessatti qooda fudhachuu akka danda’an hubatanii loogii koorniyaa irraa bilisa ta’uun dhugaa qabataan jiru giddugaleessa godhatanii barreessuun gaariidha;akkasumas dubartootni hojii ogbarruu barreessuu,dubbisuu akkasumas qeequun cuqursaa isaanirra ga’u dhiira waliin ta’uun dura dhaabbachuun cimina isaanii agarsiisuun olaantummaan dhiiraa akka xiqqaaataa deemu gochuu ni danda’u kanneen jedhan isaan ijoo dha.