የኦፖ ብሔረሰብ የለቅሶ ስርዓት ክወና ትንተና

Abstract

ይህ ጥናት በኦፖ ብሔረሰብ የለቅሶ ስርዓት ክወና ትንተና በሚል ርዕስ የቀረበ ሲሆን የጥናቱ አነሳሽ ምክንያት በኦፖ ብሔረሰብ ዘንድ በድህረ ሞት ጊዜ ያለዉ የሀዘን እርዝማኔ፣ ስለሞት ያላቸዉ አመለካከት እና የለቅሶ ስርዓተ ክዋኔ በተለያዩ ምክንያቶች ከጊዜ ወደ ጊዜ እየተለወጠ በመሄዱ ሙሉ በሙሉ ከመጥፋታቸዉ ወይም ከመለወጣቸዉ በፊት ተሰንደዉ አንዲቀመጡ በሚል ነዉ፡፡ የጥናቱ ዋና ዓላማ ደግሞ በኦፖ ብሔረሰብ የለቅሶ ስርዓት ክዋኔን መተንተን ነዉ፡፡ ዓላማዉን ለማሳካት የሚከተሉትን ጥያቄዎች ማለትም የኦፖ ብሔረሰብ ስለ ሕይወትና ሞት ያለዉ እሳቤ ምን ይመስላል? የብሔረሰቡ የለቅሶ ስርዓት ሂደት ምን ይመስላል? በለቅሶ ስርዓቱ ወቅት የሚታዩ ትዕምርቶች ምን ምን ጉዳዮችን ያመለክታሉ? በኦፖ ብሔረሰብ የለቅሶ ስርዓት የሚታዩት መንታ ገጽታዎች ምን ይመስላሉ? የሚሉ ጥያቄዎች በጥናቱ ለመመለስ ተሞክሯል፡፡ ይህ ጥናት በገላጭ ዘዴ የተጠና ሲሆን ዓላማ ተኮር የንሞና ዘዴን ለመጠቀም ለጥናት አስፈላጊ የሆኑ መረጃዎችን በምልከታ ፣ በቃለ መጠይቅና በተተኳሪ ቡድን ዉይይት የተሰበሰበ ሲሆን በክዋኔ ተኮር ፈለግና በመዋቅራዊ ንድፈ ሀሳብ ለመቃኘት ተሞክሯል፡፡ ከጥናቱም የተገኘዉ ዉጤት የኦፖ ብሔረሰብ ስለሞት ያለዉ እሳቤ ሕይወትና ሞት ከፈጣሪ የተሰጠ እንደሆነና አንድ ሰዉ ሞተ የሚባለዉ ልብና ሳንባ ሙሉ በሙሉ ስራቸዉን ሲያቆሙ እንደሆነ ከሞት በኋላም ሕይወት እንዳለ የሚያምኑ መሆኑን፣ የኦፖ ብሔረሰብ የለቅሶ ስርዓት ክዋኔ በማህበራዊ ደረጃ እና በዕድሜ የሚለያይ መሆኑ፣ በለቅሶ ስርዓት ክዋኔ የተለያዩ ትዕምርቶችን የሚጠቀሙ መሆናቸዉንና የተለያዩ መንታ ገጽታዎች ያላቸዉ መሆኑ በጥናቱ ተረጋግጧል፡፡ በአንጻሩ የኦፖ ብሔረሰብ የለቅሶ ስርዓተ ክዋኔ በተለያዩ ኃይማኖታዊ አሰተምህሮቶችን የብሔረሰቡ አባላት እየተቀበሉ በመምጣታቸዉ በፊት የነበረዉ ክዋኔ እየተቀየረና እየተለወጠ በመምጣቱ በጊዜ ሂደት ሙሉ በሙሉ ሳይጠፉ እንዲሰነድና እንዲቀረስ ምሁራንና የባህሉ ባለቤቶች የድርሻቸዉን ቢወጡ መልካም ነዉ፡፡